Хайх зүйлээ бичнэ үү

Банкны тухай


Тажикистан улсын ИМОН Интернэшнл байгууллагын удирдлагууд ХасБанкнаас туршлага судаллаа

Анх 1998 онд бичил санхүүгийн төсөл хэлбэрээр гараагаа эхэлж байсан ХасБанк 2001 онд арилжааны банк болон өргөжсөн бөгөөд өнгөрсөн 15 жилийн хугацаанд бичил, жижиг дунд бизнес төдийгүй том корпораци, байгууллагын банкны зах зээлд амжилттай нэвтэрч, санхүүгийн салбарын бүхий л түвшинд арвин туршлага хуримтлуулжээ.

ХасБанкны энэхүү туршлага олон улсын түвшинд өндрөөр үнэлэгдэн, сайн жишээ болон дурдагдахын зэрэгцээ Киргиз, Тажикистан зэрэг дундад Азийн орнууд, Африкийн буурай хөгжилтэй орнуудын бичил санхүүгийн байгууллагуудаас ирж туршлага судлах, ХасБанкны мэргэжилтнүүдээс урьж сургалт авах явдал түгээмэл байдаг билээ.

Үүний нэгэн тод жишээ нь өнгөрөгч 10-р сард Тажикистан улсын “ИМОН интернэшнл” бичил санхүүгийн байгууллагын гүйцэтгэх захирал, гүйцэтгэх тэргүүн дэд захирал, бизнес хариуцсан захирал тэргүүтэй удирдах түвшний 8 ажилтан ХасБанканд зочилж, туршлага судлан, сонирхсон сэдвийнхээ хүрээнд сургалт авсан явдал байлаа.

Сургалт ХасБанкны түүхэн замнал, хүрсэн амжилт, хүний нөөцийн менежмент, санхүүгийн удирдлага, салбарын үйл ажиллагаа, бүтээгдэхүүн үйлчилгээ, маркетинг, мэдээллийн технологийн дэд бүтэц гэсэн сэдвүүдээр 10 хоногийн турш амжилттай явагдсан бөгөөд ИМОН итернэшнл байгууллагын зочид маань сэдэв бүрээр тусгайлан сургалтын материал бэлтгэсэнд талархаж, сургалтын агуулга, чанарт сэтгэл хангалуун байгаагаа илэрхийлж байлаа.

Энэхүү сургалт нь “ИМОН интернэшнл” байгууллага ХасБанкнаас туршлага судлан, суралцаж буй 3 дахь удаагийн тохиолдол юм. Мэргэжил нэгт анд нөхдөдөө амжилт хүсье!