ХасБанк “Бичил санхүүгийн өдөр"-ийг тохиолдуулан харилцагчдадаа cургалт зохион байгуулж байна
Өнөөдөр буюу 2016 оны 10-р сарын 20-ны өдөр Европын Бичил санхүүгийн сүлжээ (European Microfinance Network) болон Бичил санхүүгийн төв (Microfinance Centre)-өөс нийт гишүүн байгууллагуудынхаа хүрээнд “Европын бичил санхүүгийн өдөр”- ийг тэмдэглэн өнгөрүүлж байна.
2 дахь жилдээ тэмдэглэж буй уг арга хэмжээнд энэ жил Герман, Франц, Испани, Грек, Итали, Нидерланд, Казакстан, Серб, Гүрж, Белги, Румин, Унгар, Ирланд зэрэг улсуудын 23 санхүүгийн байгууллага нэгдсэн бөгөөд бичил бизнес эрхлэгч иргэдэд зориулан санхүүгийн боловсрол олгох сургалт, нээлттэй өдөрлөг, үзэсгэлэн худалдаа гэх мэт үйл ажиллагааг нэгэн зэрэг зохион байгуулж байгаа юм.
ХасБанк Бичил санхүүгийн төвийн гишүүн байгууллага бөгөөд энэ өдөр Хүчит шонхор, Зуун айл, Нарантуул, Өнөр ТТ, Тумбааш, Хэнтий, Эрдэнэт, Увс, Налайх гэсэн нийт 9 салбараараа дамжуулан Бичил бизнес эрхлэгч харилцагчдадаа зориулан “Илүү боломжийг таны бизнест” сургалтыг зохион байгуулж байна. Тус сургалтаар зээл авахад шаардлагатай анхан шатны мэдлэг, барьцаа хөрөнгө, бүрдүүлэх материал, эргэн төлөлтийн талаар мэдлэгийг олгох, өрийн дарамтаас хэрхэн сэргийлэх, зөв тооцоолол хийх зэрэг хэрэгцээт мэдээллийг хүргэлээ.
Бичил санхүүгийн төв нь бичил санхүүгийн тогтвортой үйл ажиллагаанд тулгуурлан хүний хөгжлийг дэмжих, ядуурлыг бууруулах зэрэг нийгэмд чиглэсэн үйл ажиллагаа явуулдаг олон улсын байгууллага бөгөөд дэлхийн 31 орны 101 гишүүн байгууллагаараа дамжуулан бага орлоготой 1 сая орчим иргэнд санхүүгийн үйлчилгээ үзүүлж байна.
