ХасБанк 2025 оны II улиралд 41.8 тэрбум буюу оны эхнээс өссөн дүнгээр 85.9 тэрбум төгрөгийн татварын дараах цэвэр ашигтай ажиллалаа. Ингэснээр өөрийн хөрөнгийн өгөөж (annualized ROE) 22.6%, нэгж хувьцаанд ногдох цэвэр ашиг (annualized EPS) 163.4 төгрөгт хүрлээ.
2025 оны II улирлын санхүүгийн үзүүлэлтээс онцолбол:
· Зээл ба санхүүгийн түрээсийн багц 4,221 тэрбум төгрөгт хүрч, өмнөх улирлаас 9.7% өссөн байна. Үүнд: Иргэдийн зээлийн багц 7.5%-р өсөж 2,921 тэрбум, Байгууллагын зээлийн багц 11.1% өсөж 690 тэрбум төгрөг, ХасЛизингийн багц 20.2%-р өсөж, 611 тэрбум төгрөгт тус тус хүрсэн нь активын өсөлтөд голлох нөлөөг үзүүлсэн байна.
· Нийт харилцах, хадгаламжийн үлдэгдэл өмнө улирлаас 1.7% өсөж 3,421 тэрбум төгрөгт хүрсэн байна. Тайлант хугацаанд Банкны бүтээгдэхүүн үйлчилгээг авах цахим сувгийг нэмэгдүүлэхээс гадна өдөр тутмын төлбөр тооцоог хялбарчлах InstaXpay, 7-17 насны хүүхдүүдэд зориулсан XacTeen аппликейшнуудыг зах зээлд нэвтрүүлж, Тэрбум төгрөгийн шагналын сантай хадгаламжийн урамшуулалт аян зэрэг харилцагчдад чиглэсэн хөтөлбөрүүдийг амжилттай хэрэгжүүлсэн нь харилцах, хадгаламжийн өсөлтөд эергээр нөлөөлсөн байна.
· Мөн 2025 оны II улиралд EBRD, Finnfund, DWM зэрэг олон улсын банк санхүүгийн байгууллагаас нийт 162.3 сая ам.долларын эх үүсвэрийг амжилттай татан төвлөрүүлж ажиллалаа.
· Тайлант хугацаанд ХасБанк Монголбанкнаас тогтоосон зохистой харьцааны шалгуур үзүүлэлтүүдийг бүрэн хангаж ажиллалаа. Үүнд Нэгдүгээр зэрэглэлийн өөрийн хөрөнгө болон эрсдэлээр жигнэсэн активын зохистой харьцаа 18.3% (байвал зохих хэмжээ 12.5%). Төлбөр түргэн гүйцэтгэх чадварын харьцаа 36.0% (байвал зохих хэмжээ 25.0%).
Мөн ХасБанк ХК-ийн хувьцаа эзэмшигчдийн 2025 оны ээлжит бус хурал 07 дугаар сарын 25-ны өдрөөс 08 дугаар сарын 26-ны өдрийн хооронд эчнээ санал хураалтын хэлбэрээр, цахимаар зохион байгуулагдах бөгөөд эрхэм хувьцаа эзэмшигч та ЭНД дарж хурлын материалтай танилцана уу.
ХасБанкны 2025 оны 2-р улирлын Санхүү, үйл ажиллагааны тайлан, Санхүүгийн байдлын болон Орлого, үр дүнгийн тайлангуудтай доорх холбоосуудаар танилцана уу.
